Gweithdy Caneuon Cymraeg (2 Ebrill 2011)

Cliciwch ar y poster weld fersiwn mwy...

Mae cynnyrch y gweithdai blaenorol ar gael i'w lawrlwythno yma.

Adnoddau newydd i bobl ifanc

Mae ‘Priodas, Rhyw a Byw yn Ddoeth’ yn gyflwyniad PowerPoint sydd wedi ei gynhyrchu gan Lovewise, elusen Gristnogol o Newcastle-upon-Tyne.

Mae Lovewise wedi bod yn creu adnoddau ar briodas, rhyw a pherthynas, i ysgolion a grwpiau ieuenctid, ers 2003.

Arfon Jones o elusen gig a beibl.net sydd wedi cyfieithu’r cyflwyniad i’r Gymraeg.

Mae Priodas, Rhyw & Byw yn Ddoeth yn edrych ar y dewision sy’n wynebu pobl ifanc, ar briodas, ar fanteision cadw rhyw at briodas, ac ar weddau ymarferol mynd allan gyda rhywun – a hynny o safbwynt Cristnogol.

Mae’r cyflwyniad wedi ei fwriadu i fod yn rhyngweithiol, ac mae’n cynnwys clip fideo o wasanaeth priodas Cymraeg. Mae’r cyflwyniad PowerPoint yn dod gyda sgript sy’n ganllaw i’r cyflwynydd.

Gellir prynu copi o “Priodas, Rhyw & Byw yn Ddoeth” o swyddfa Lovewise drwy ffonio 0191 281 3636 neu e-bostio info@lovewise.org.uk. Y pris yw £10.

Mae gan Lovewise lawer o adnoddau eraill yn yr iaith Saesneg ar gyfer ysgolion a grwpiau ieuenctid. Mae adnoddau amrywiol ar gael, i’w defnyddio gyda blynyddoedd ysgol 5-11. Yn eu plith mae adnodd rhyngweithiol pedair rhan o’r enw ‘Growing up …growing wise’ i’w ddefnyddio mewn ysgolion cynradd. Mae mwy o wybodaeth am yr adnoddau eraill hyn i’w gweld ar wefan Lovewise – www.lovewise.org.uk.

Adroddiad Blynyddol GiG 2009

Mae copi o Adroddiad Blynyddol GiG ar gyfer 2009 yn awr ar gael i'w lawrlwytho o wefan GiG - ewch draw at www.gobaith.org.

Penblwydd GiG yn 10 oed!

Mae gig yn 10 oed! Wnewch chi ddathlu gyda ni?

Roedd sefydlu’r elusen ‘Gobaith i Gymru’ yn 1999 yn gam o ffydd, ond i Arfon roedd yn ymateb i alwad. A gallwn dystio fod Duw wedi bod yn ffyddlon! Rydym wedi rhyfeddu’n gyson at ddaioni Duw a haelioni ei bobl.

Mae llawer eisoes wedi ei gyflawni, ond mae gwaith mawr eto o’n blaenau. Prif brosiect gig, wrth gwrs, fu beibl.net. Roedd Arfon wedi dechrau gweithio ar y syniad o gyfieithu’r Testament Newydd i Gymraeg llafar, syml, tua 1995 – bymtheg mlynedd yn ôl! Ond sefydlu gig ddeg mlynedd yn ôl roddodd y cyfle iddo fwrw ati o ddifrif, a sefydlu gwefan beibl.net yn 2002. Mae’r wefan wedi denu cenhedlaeth newydd o bobl ifanc yn eu harddegau ac oedolion ifanc, ac yn cael ei defnyddio’n rheolaidd gan athrawon ac ysgolion, eglwysi, unigolion ac ysgolion sul.

Bellach mae Arfon, gyda chymorth Angharad Roberts, a nifer o ddarllenwyr, wedi treulio’r blynyddoedd diwethaf yn gweithio ar gyfieithiad llafar o lyfrau’r Hen Destament. A dyma’r newyddion da! – Rydym yn amcangyfrif y gellir cwblhau y cyfieithiad mewn tair blynedd arall!

Rydym yn edrych am 100 o eglwysi fydd yn fodlon sefyll gyda ni, yn bartneriaid, i weld cyfieithiad beibl.net yn cael ei orffen. A fyddai eich eglwys chi yn fodlon cyfrannu’n fisol tuag at y gwaith am y tair blynedd nesaf?

Gallwch wneud hynny trwy lenwi’r ffurflen archeb banc sydd ar gael o www.gobaith.org/cefnogi

Drwy gefnogi beibl.net byddech yn buddsoddi yng ngwaith y Deyrnas, i gyflwyno’r efengyl i’r genhedlaeth sy’n codi. Wrth gwrs, gall unigolion bartneru gyda ni hefyd! A hyd yn oed os nad ydych chi’n gallu cyfrannu’n ariannol, wnewch chi ymrwymo eto i weddïo’n gyson dros brosiect beibl.net am y tair blynedd nesaf? Byddwn yn anfon llythyr gweddi deirgwaith y flwyddyn, i ddweud sut mae’r gwaith yn dod yn ei flaen.

Yn rhwymau’r Efengyl

Owain Roberts
Cadeirydd Gobaith i Gymru

Beth mae pobl yn ei ddweud?

Dwi isio dweud pa mor wych ydy beibl.net! Mae'n ffantastig gallu darllen y gair mewn Cymraeg medra'i ddallt!”

Mari Griffith (Tearfund – Teddington)

“Wedi bod ar beibl.net, ar unig beth dwi'n gallu ddweud ydy WAW!! ffantastic!”

Gwydion Evans

“Mae ein capel ni wedi dechrau gwneud gwaith gyda’r ysgolion lleol yn ddiweddar. Mae beibl.net yn un o’r prif adnoddau y’n ni’n eu defnyddio. Ryn ni’n defnyddio beibl.net am ei fod wedi ei ysgrifennu yn iaith pobl gyffredin ac yn ddigon hawdd i blant 5-11 oed ei ddeall. Mae dros 80% o’r plant ydyn ni’n cysylltu a nhw yn dod o gartrefi Saesneg.”

Ian Hughes

“Er ein bod yn sylweddoli fwyfwy yr angen dybryd am fersiwn o’r Beibl â’i iaith a’i arddull yn nes at yr hyn a arferir ar lafar, ac a fyddai felly’n fwy rhydd a phoblogaidd ei naws ac a fyddai hefyd, o bosibl, yn nes at fod yn aralleiriad nag yn gyfieithiad, nid oedd y Cydbwyllgor na’r panelau yn ystyried mai dyna ein tasg ni.”

Rhagarweiniad Cyffredinol, Beibl Cymraeg Newydd (Argraffiad Diwygiedig)

“Beth yw beibl.net i mi? Ateb i weddi – ‘lifeline’. Ces i fy magu mewn cartre di-gymraeg, ac yn cael yr hen gyfieithaid Cymraeg a’r Beibl Cymraeg Newydd yn anodd i’w deall. Mae beibl.net wedi agor y gair i mi yn yr iaith dw i’n ei charu, ac mewn Cymraeg dw i’n ei ddeall.”

Lewis Roderick

“Credaf bod beibl.net yn adnodd hynod o bwysig i blant a ieuenctid heddiw, ac yn un y mae Cyngor Ysgolion Sul Cymru yn awyddus iawn i'w gefnogi a'i hyrwyddo. Gobeithiwn weld yr adnodd hwn yn cael ei ddatblygu fwyfwy eto, i gynnwys yr Hen Destament a mwy o adnoddau atodol. Cefnogwn unrhyw ddatblygiad o'r adnodd hynod gyffrous hwn.”

Aled Davies, Ysgrifennydd Cyffredinol Cyngor Ysgolion Sul Cymru

beibl.net yn eich poced!

Mae beibl.net bellach ar gael ar eich ffôn symudol. Gallwch lawrlwytho copi o'r Testament Newydd o'r wefan yma.

Mae beibl.net yn un o brosiectau

Adnoddau Newydd ar Beibl.net - Cwisiau Rhyngweithiol

Erbyn hyn mae ‘na 50 o gwisiau PowerPoint lliwgar i blant ar wefan beibl.net.

Mae’r cwisiau yn lliwgar a rhyngweithiol – rhai yn haws na’i gilydd. Mae rhai cwestiynau’n hollol syml, ‘Pwy oedd mam Iesu Grist?’ tra bod cwestiynau eraill yn cynnig mwy o her, ‘Beth oedd enw mam Moses ac Aaron?’.

Mae ‘na gwisiau am bobl yn y Testament Newydd a phobl yn yr Hen Destament, yn ogystal â chwisiau am lefydd, mynyddoedd a gwaith yn y Beibl.

Mae’n bosib lawrlwytho’r cwisiau a’u cysylltu â thaflunydd er mwyn chwarae’r gemau gyda criw o blant mewn clwb neu Ysgol Sul. Mae’n bosib hefyd i blentyn eistedd o flaen y cyfrifiadur a phrofi ei hun yn y tŷ!

I weld yr adnoddau newydd ewch i:

www.beibl.net > Adnoddau> Eglwysi> Gemau

un o brosiectau Gobaith i Gymru (GiG)

beibl.net - Adnoddau ABaCh AM DDIM i athrawon!

Mae adnoddau ABaCh yn awr ar gael AM DDIM i athrawon ar wefan beibl.net >> yma

Dyma grynodeb o'r hyn sydd ar gael ar gyfer pynciau gwahanol:

Taflen wybodaeth: Braslun o’r pwnc dan sylw o fewn fframwaith Cristnogol. Nid gwersi yw rhain, ond syniadau a gwybodaeth ar gyfer athrawon. Mae deunydd trafodaeth a chwestiynau i feddwl ymhellach yn eu cylch.

Adnodau: detholiad o adnodau perthnasol, sef yr adnodau y cyfeirir atynt yn y Daflen Wybodaeth. Daw’r adnodau i gyd o gyfieithiad www.beibl.net.

PowerPoint: Un sleid liwgar gydag amrywiol ddarluniau a geiriau, i’w defnyddio mewn sesiwn trafod syniadau. Mae’r lluniau yn ogystal a’r geiriau yn ysgogi trafodaeth. Mae sleid PowerPoint ar fwrdd gwyn yn ffordd gyfleus o rannu dogfen gyda dosbarth cyfan.

Mae’r ddwy ddogfen ganlynol yn ddogfennau pdf – bydd angen Adobe Reader i’w hagor a’u darllen. (Gellir lawr-lwytho Adobe Reader am ddim yma.)

Du a gwyn: Hawdd i’w llungopïo!

Lliw: Defnyddiol ar gyfer creu arddangosfa. Hefyd, os am drafod amrywiol destunau mewn gwahanol grwpiau mae un poster lliw rhwng grŵp yn gallu bod yn llawer mwy effeithiol nag un du a gwyn.

Adnoddau amrywiol: Gyda rhai testunau yn unig. Gwersi, syniadau am drafodaethau ayyb.

Beibl.net - y diweddaraf

Dyma nodyn sydyn i’ch hysbysu fod Beibl.net ar ôl deufis rhwystredig yn gwella gam wrth gam! Mae fersiwn anllygredig o’r wefan bellach nôl arlein. Yn ogystal mae nifer cyfyngedig o’r adnoddau ar gael. Rhaid pwysleisio fodd bynnag nad ydi’r wefan yn gwbl holliach. Rydym yn gobeithio symud y wefan i weinydd newydd a fydd yn sicrhau fod y wefan yn fwy dibynnadwy.

Os ydych chi’n dal i weld fersiwn llygredig o’r wefan arlein bydd angen i chi ddileu eich ‘Temporary Internet Files’ yn eich porwr we (Internet Explorer, Firefox ayyb) ac yna cyfeirio’r porwr at http://www.beibl.net/.

Diolch am eich hamynedd!

Anfon allan Llythyr Gweddi Gobaith i Gymru

Mae’n debyg iawn bod y rhan fwyaf ohonoch chi wedi clywed am Beibl.net – aralleiriad cwbl wreiddiol a chyfoes o’r Testament Newydd. Fodd bynnag, mae’n bosibl nad ydych chi’n gwybod mai’r elusen sy’n cynnal y gwaith yw Gobaith i Gymru (GiG). Ewch i http://www.gobaith.org/ i ddarganfod mwy am weledigaeth GiG! Yr wythnos hon mae Llythyr Gweddi GiG at gefnogwyr y gwaith wedi cael ei anfon ledled Cymru. Dilynwch y ddolen hon i gael gweld copi o’r llythyr diweddaraf. Os hoffech chi gefnogi gwaith GiG mewn unrhyw ffordd neu gael eich ychwanegu i restr cefnogwyr GiG (dim ond 3 gwaith y flwyddyn caiff y llythyrau eu hanfon allan!) cysylltwch â mi trwy e-bostio - owain.roberts@gmail.com neu ar Facebook.